सोमबार, ९ असार २०७६
DainikNepal.com
सोमबार, ९ असार २०७६

निर्मला पन्त हत्याकाण्ड : दोषी एसपी सिंहलाई बढुवाको पुरस्कार

दैनिक नेपाल २०७६ जेठ २७ गते ९:४४

काठमाडौं, २७ जेठ । निर्मला पन्त बलात्कार र हत्याकाण्डमा कारबाहीका लागि सिफारिसमा परेका एसपी राकेशकुमार सिंह एसएसपीको बढुवा सूचीमा परेका छन् ।

गृह मन्त्रालय उच्च स्रोतका अनुसार एसपी सिंहलाई एसएसपीमा बढुवाका लागि सिफारिस गरिएको छ । एसपी सिंहकाे बढुवामा विवाद हुन्छ भनेर सूची गुपचुप राखिएकाे स्राेतकाे भनाइ छ ।

विधि विज्ञान प्रयोगशालामा कार्यरत एसपी सिंहलाई निर्मला पन्त बलात्कार र हत्यकाण्डमा परीक्षणमा लापरपाही गरेको भन्दै राष्ट्रिय मानवअधिकार आयोगले कारबाहीका लागि सिफारिस गरेको छ ।

निर्मला हत्याकाण्डमा दोषी पाइएका प्रहरीहरू कोही निलम्बनमा परेका छन् भने कोही जागिरबाट बर्खास्थ भइसकेका छन् । तर, एसपी सिंहले सेटिङ मिलाएर बढुवाको सिफारिसमा परेको उच्च स्रोतको दाबी छ ।

एसपी सिंह राजनीतिक पावर लगाएर एसएसपीमा बढुवा हुन लागेपछि नेपाल प्रहरीभित्रै खैलाबैला मच्चिएको छ ।

विवादित छविका एसपी सिंहका कारण प्रहरी संगठनकै बदनाम भएको आरोप लागेको छ । एसपी सिंहकै कारण विधि विज्ञान प्रयोगशालाको परीक्षणमाथि नै प्रश्न उठिसकेको छ ।

निर्मला पन्त प्रकरणमा डीएनएमा गडबढी गरेको राष्ट्रिय मानवअधिकारको प्रतिवेदनमा उल्लेख छ ।

कारबाही सिफारिसमा परेका एसपी सिंहको बढुवा हुने हो भने निर्मला बलात्कार र हत्याकाण्डको छानविनमा दोषी पाइएका अन्य प्रहरी कर्मचारीहरूलाई पनि सफाइ दिनुपर्ने माग उठेको छ ।

विगत २५ वर्षदेखि डीएनए परीक्षण गर्दै आएको नेपाल विज्ञान तथा प्रविधि प्रतिष्ठान (नाष्ट) सँग डीएनएको २५ क्यारेक्टर जाँच गर्ने क्षमता रहेको छ ।

विधि विज्ञान प्रयोगशालाका प्रमुख समेत रहेका प्रहरी एसपी सिंह आफैले निर्मलाको भेजिनल स्वाबबाट डीएनए जेनेरेट गरेको स्रोतको भनाइ छ ।

विधि विज्ञान प्रयोशालाको डीएनए विभागका प्रमुख समेत रहेका सिंहले त्रुटिपूर्ण ढंगले डीएनए परीक्षण गरेको उल्लेख गर्दै राष्ट्रिय मानव अधिकार आयोगले उनीसहित भेजिनल स्वाब संकलन गर्ने डाक्टरलाई समेत कारबाही गर्न सिफारिस गरेको छ ।

प्रधानमन्त्री कार्यालयमा सिफारिससहित ०७३ माघ १३ गते बुझाइएको उक्त रिपोर्ट उपर प्रधानमन्त्री कार्यालय र प्रहरी प्रधान कार्यालयले कुनै चासो देखाएका छैनन् ।

‘भेजिनल स्वाबलगायतका नमूनाहरू संकलन गर्दा नमूना संकलन प्रक्रिया नै त्रुटिपूर्ण रहेको देखियो’, राष्ट्रिय मानव अधिकार आयोगको रिपोर्टमा भनिएको छ, ‘निर्मला पन्तको घटनामा वाईएसटीआर प्रविधिबाट मात्रै डीएनए परीक्षण गरेको पाइयो, यसबाट वंश समूह पहिचान गर्न सघाउ पुग्ने । तर व्यक्ति पहिचान गर्न सकिने आटो सोमल प्रविधि प्रयोग गरेको पाइएन ।’

प्रतिक्रिया
सम्बन्धित