नेकपा एकता : बाँकी काम वैशाखभित्रै

काठमाडौं, १४ वैशाख । सत्तारुढ दल नेपाल कम्युनिस्ट पार्टी (नेकपा) ले एकता प्रक्रियाको बाँकी काम वैशाखभित्रै गर्ने भएको छ । ९ वैशाखमा अध्यक्ष र सचिवसहित जिल्ला कमिटीको टुंगो लगाएको पार्टीले एकताको बाँकी काम पनि वैशाखभित्रै टुंग्याउने तयारी गरेको छ । राजधानी दैनिकले समाचार छापेको छ ।

३ जेठमा तत्कालीन एमाले र माओवादी केन्द्रका बीचमा एकता घोषणा भएको थियो । पार्टी एकता भएको ११ महिनापछि जिल्ला कमिटीले पूर्णता पायो । नेकपा अध्यक्षद्वय केपी शर्मा ओली, पुष्पकमल दाहाल र वरिष्ठ नेता माधवकुमार नेपालका बीचमा लामो छलफलपश्चात् जिल्ला कमिटीको टुंगो लागेको हो ।

नेकपा स्थायी कमिटीका सदस्य देवेन्द्र पौडेलले एकतासम्बन्धी बाँकी सबै काम वैशाख महिनाभित्रैमा टुंगो लाग्ने बताए । जिल्ला नेतृत्व टुंगो लागेको बताउँदै उनले बाँकी काम टुंगो लगाउन शीर्ष नेताहरू आन्तरिक गृहकार्यमा जुटेको बताए ।

‘हामीले जिल्लाको टुंगो लगायौं, बिस्तारै बाँकी काम पनि वैशाखभित्रैमा टुंगो लाग्छ,’ पौडेलले भने, ‘वैशाखभित्रमा सबै बाँकी काम टुंगो लगाउन शीर्ष नेताहरू गृहकार्यमा जुट्नुभएको छ ।’

यसअघि नै सचिवालय, केन्द्रीय कमिटी, प्रदेश कमिटी र जिल्ला कमिटीको घोषणा भइसकेको छ । अब पोलिटब्युरो कमिटी, विभाग, प्रवास, केन्द्रीय सदस्यको जिम्मेवारी बाँडफाँट, जनवर्गीय संगठनसहित स्थानीय तहको एकता अझै टुंगो लागेको छैन । एकतासम्बन्धी बाँकी रहेका काम छिट्टै नै टुंगो लगाएर पार्टीको सम्पूर्ण ध्यान तीनै तहको सरकार सञ्चालनमा केन्द्रित गर्ने पौडेलले बताए ।

अहिले एकताका बाँकी काम टुंगो लगाउनमा पनि समय खर्च भइरहेको बताउँदै उनले अब जनताको काम ठीक तरिकाले अघि बढाउने अभियानमा पार्टी जुट्ने बताए । साथै एकताको सन्देश दिनेगरी देशैभरि जागरण अभियानसमेत पार्टीले सञ्चालन गर्ने उनले बताए ।

एकता टुंगो लाग्नमा ढिलाइ भएका कारण त्यसको प्रभाव पार्टीका साथै सरकार सञ्चालनमा समेत परेको छ । पार्टीको बैठक, प्रशिक्षण, भेलालगायतका गतिविधि अहिले शून्यजस्तै भएको छ । जिम्मेवारी बाँडफाँट एवं एकता टुंगो लाग्न नसक्दा नेता कार्यकर्ता नै बेरोजगार भएका छन् ।

नेकपाका स्थायी कमिटी सदस्य गणेश साहले पार्टीमा अब कोही पनि बेरोजगार वा जिम्मेवारीविहीन बन्नुपर्ने अवस्था नआउने बताए । लामो गृहकार्यपश्चात् जिल्ला कमिटीको टुंगो लागेको बताउँदै उनले बाँकी काम पनि टुंगो लगाउन समय नलाग्ने बताए ।

‘एकतासम्बन्धी धेरै काम टुंगो लागिसक्यो, बाँकी रहेका काम टुंगो लगाउन अब बढी समय लाग्नेछैन,’ साहले भने, ‘शीर्ष तहमा गहन रूपमा तयारी भइरहेको छ, बाँकी काम पनि छिट्टै टुंगो लाग्छ ।’