रुपन्देही, २६ फागुन । रुपन्देही सम्मरीमाई गाउँपालिका अध्यक्ष जितेन्द्रनाथ शुक्ला (बब्लु) ले नेकपा परित्याग गरेका छन् । बब्लुले आफ्नी श्रीमती पल्लबी शुक्लासहित पार्टी परित्याग गरेको घोषणा गरेका हुन् । पल्लबी गत निर्वाचनमा रुपन्देही क्षेत्र नं ४ बाट प्रदेश सभा सदस्य उम्मेदवार बनेकी थिइन् ।
स्थानीय तह निर्वाचनमा मधेशी जनअधिकार फोरम (लोकतान्त्रिक)बाट गाउँपालिका अध्यक्ष निर्वाचत उनलाई तत्कालिन नेकपा एमाले उपाध्यक्ष बामदेव गौतम र उपमहासचिब बिष्णु पौडेलले एमालेमा प्रवेश गराएका थिए ।
शुक्लाले केही समय अघि प्रदेश सरकारले शुरु गरेको मुख्यमन्त्री ग्रामिण बिकास कार्यक्रममा गाउँपालिकाको लागि कार्यक्रम सहजकर्ता गलत आचरण भएको व्यक्ति चयन गरेकोले असन्तुष्टी जनाउँदै पार्टी परित्याग गरेको घोषणा गरेका हुन् ।
शुक्लाका अनुसार मुख्यमन्त्री ग्रामिण बिकास कार्यक्रमको सहजकर्ताको बिषयमा आफूले नेकपा महासचिब बिष्णु पौडेल, मुख्यमन्त्री शंकर पोखरेल, मन्त्री लिला गिरी र आरती पौडेलसँग छलफल गरेता पनि उनीहरुले आफ्नो कुरा नसुनेपछि पार्टी त्याग्ने निर्णयमा पुगेका हुन् ।
यसैगरी, शुक्लाले आफूलाई पार्टी प्रवेश गराएपनि मर्चवार क्षेत्रमा नेकपाको कमिटी गठन गर्ने बेला कुनै सल्लाह नै नलिएको बताएका थिए । मर्चवार क्षेत्रमा नेकपाको जनमत थोरै भएको तर, आफू पार्टीमा प्रवेश गरेपछि स्थिती राम्रो भएको बताउँदै शुक्लाले आफू कसैको दमन सहेर पार्टीमा बस्न नचाहेको जानकारी दिए ।
मर्चवारको बिकासमा आफूले धेरै काम गर्न चाहेता पनि पार्टी र सरकारले असहयोग गरेको बताउदै शुक्लाले अब आफू स्वतन्त्र रहेर मर्चवारका जनताको चाहना अनुसार अघि बढ्ने बताए ।
मर्चवारमा भारतीय सिमा तैरेनी नाका खोल्न र स्तरिय सडक निर्माण गर्न डेढ बर्षदेखि आफूले धेरै प्रयास गरेको तर, यसमा पनि पार्टी र सरकारबाट कुनै सहयोग नपाएको शुक्लाले दाबी गरेका छन् ।
जिल्लाको दक्षिणी क्षेत्र मर्चवारस्थित आफ्नै निवासमा आइतबार बिहान कार्यक्रम गरी शुक्लाले नेकपा परित्याग गरेको घोषणा गरेका हुन् ।
प्रतिक्रिया