बुधबार, ११ वैशाख २०७६
DainikNepal.com
बुधबार, ११ वैशाख २०७६

निर्मला हत्याकाण्ड : पतिलाई जोगाउन पत्नी आइन मैदानमा

दैनिक नेपाल २०७५ कार्तिक ६ गते ६:३२

महेन्द्रनगर, ६ कात्तिक । निर्मला पन्तको बलात्कारपछि हत्याको अनुसन्धानमा लापरबाही गरेको भन्दै प्रहरी प्रधान कार्यालयद्वारा बर्खास्तीका लागि सिफारिसमा परेका प्रहरी निरीक्षक जगदीशप्रसाद भट्टकी पत्नी निर्मला भट्टा (बसन्ती)ले आफ्ना पतिलाई फसाउन लागेको आरोप लगाएकी छिन् ।

निरीक्षक भट्टलाई बर्खास्तीका लागि प्रहरी प्रधान कार्यालयले गृह मन्त्रालयलाई सिफारिस गरेपछि सोमबार भट्टकी पत्नी निर्मलाले भीमदत्त नगरपालिका–१८ निम्बुखेडास्थित घरमै पत्रकार सम्मेलन गरेर जगदीश भट्टलाई सरकारले फसाउन खोजेको आरोप लगाएकी हुन् ।

प्रहरी निरीक्षक भट्टकी श्रीमती निर्मला भट्टले सरकारले आफ्ना श्रीमानलाई फसाउन खोजेको बताइन् । उनले अनुसन्धान अधिकारी र मुद्दा फाँटका इन्चार्ज नभइ घटना भएको क्षेत्रमा वडा इन्चार्ज भएका कारण उनलाई फसाउन खोजेको गुनासो पोखिन् ।

‘मेरा श्रीमानलाई प्रहरीका उच्च अधिकारीले बारम्बार हत्यामा तेरो पनि संलग्नता छ, हत्यारालाई सघाएको छस, त्यो उखुबारी पनि तेरै आफन्तको हो भन्दै मानसिक यातना दिइरहेका छन्’, उनले भनिन्, ‘श्रीमानलाई झुटको खेती गरिरहेको छस, जेल हालिदिन्छु भन्दै प्रहरीबाटै धम्की आईरहेको छ ।’

निर्मला पन्त हराएको विषयमा पीडित परिवारले वडा कार्यालयमा फोनमार्फत जानकारी गराएको र हुलिया सहित फोटो ल्याउनु भनेर श्रीमानले भनेको उनले बताइन् ।

निर्मलाको शव फेला पर्ने वित्तिकै श्रीमानले नै रोशनी बम र बबिता बमको घरमा खानतलासी र सोधपुछ गरेको उनले बताइन् ।

निर्मला पन्तको बलात्कारपछि हत्याको अनुसन्धानमा लापरबाही गरेको भन्दै प्रहरी प्रधान कार्यालयले प्रहरी उपरीक्षक दिल्लीराज विष्ट र प्रहरी निरीक्षक जगदीशप्रसाद भट्टलाई बर्खास्तीका लागि गृह मन्त्रालयलाई सिफारिस गरेको थियो ।

प्रतिक्रिया
सम्बन्धित