मंगलबार, २७ कार्तिक २०७५
DainikNepal.com
मंगलबार, २७ कार्तिक २०७५

सरकारले दुई तिहाईको दम्भ देखायो भन्ने कांग्रेसलाई नेकपाको कडा जवाफ

दैनिक नेपाल २०७५ कार्तिक ३ गते २०:२१

काठमाडौं, ३ कात्तिक । प्रमुख प्रतिपक्षी नेपाली कांग्रेसले कहिले अधिनायकवाद र अहिले सरकारले दुई तिहाईको दम्भ देखाएको टिप्पणी गरेपछि सत्तारुढ दल नेपाल कम्युनिष्ट पार्टीले जवाफ फर्काएको छ।

नेकपाका नेता दिनानाथ शर्माले विपी कोइरालाको जननिर्वाचित सरकार पनि बहुमतको दम्भकै कारण ढलेको जवाफ दिएका हुन्। उनले केपी शर्मा ओली नेतृत्वको वर्तमान सरकारले कुनै दम्भ नदेखाएको समेत स्पष्ट पारे।

सरकारलाई खबरदारी गर्ने प्रतिपक्षी दलको धर्म भएकोले राष्ट्रिय विकास निर्माणको काममा विरोध होइन सँगसँगै मिलेर अघि बढ्नुपर्ने उनको धारणा छ। उनले भने, ‘वर्तमान सरकारले दुई तिहाईको दम्भ देखाएको छैन्। सरकार गठन भएको भर्खरै ७ महिना भएको छ । हिजो विगतमा दुई तिहाईको दम्भ देखाएर विपीको सरकार पनि ढलेको होईन् । पार्टीभित्रकै अलोकतान्त्रिक गतिविधिका कारण विपीको सरकार ढलेको हो ।’

नेपालको लोकतान्त्रिक आन्दोलनमा आफूहरुले सँगै लडेको सुनाउँदै शर्माले आगामी दिनमा पनि मिलेर अघि बढ्नुपर्ने धारणा राखे । कालाबजारी र सामाजिक असुरक्षाका विषयमा सबै दलहरु एकजुट भएर अघि बढ्नुपर्ने पनि उनले धारणा राखे । उनले भने, ‘सरकार परिवर्तन भयो भने कालाबजारीहरु हामी राजनीतिक दलकै संरक्षणमा टाउको उठाउँछन् । हिजो ०४७ सालमा भएको पनि त्यही हो । हामी सबै कालाबजारी, सामाजिक असुरक्षा र भ्रष्टाचारीको विरुद्धमा लड्नुपर्छ । जसले भ्रष्टाचार गरेका छन्, कर्मचारी पनि पक्राउ परेका छन् । अरु पनि पक्राउ परेका छन् । ती कसको झण्डामुनि पक्रिएका छन् ? भनेर हामी सम्पूर्ण राजनीतिक दलहरुले आत्मसमिक्षा गर्नुपर्छ । भ्रष्टाचारका विरुद्ध सत्तापक्ष र प्रतिपक्ष सबै एक ढिक्का भएर लड्नुपर्छ ।’

भ्रष्टाचारीहरुप्रति अब सबै दल अनुदार बन्नुपर्ने उनको धारणा छ । उनले राष्ट्रिय गौरवको आयोजना निर्माण गर्ने विषयमा कसैले विरोध गर्न नहुने उनले बताए । उनले भने,‘यो ७० वर्षको अवधिमा उर्जामा हामीले कति विकास गर्यौं ? अब समिक्षा गरौं । लायक भनेपनि हामी नैं हौं । नालायक भनेपनि हामी नै हौं ।’ सरकारको बारेमा आलोचना र विरोध गरेरमात्रै विकार र समृद्धि नहुने उनले जिकिर गरे ।

प्रतिक्रिया
सम्बन्धित