सिंहजस्तै नडराई काम गर्छु : लालबाबु पण्डित, वातावरण मन्त्री (अन्तर्वार्ता)

तत्कालिन काँग्रेस सभापति शुशिल कोइरालाको मन्त्रीमण्डलमा सामान्य प्रशासन मन्त्री भएर चर्चामा आएका नेकपा एमालेका पोलिटब्यूरो सदस्य लालबाबु पण्डित बिहीबार जनसंख्या तथा वातावरण मन्त्री नियुक्त भएका छन् । नेपालका ४१ औँ प्रधानमन्त्रीको रुपमा एमाले अध्यक्ष केपी शर्मा ओलीले शपथ लिए लगत्तै पण्डितले मन्त्रीको शपथ लिएका हुन् ।

कडा स्वभावका मन्त्रीको रुपमा परिचित पण्डित स्वच्छ छबिका नेता हुन् । उनी गएको मंसिरमा सम्पन्न प्रतिनिधि सभाको निर्वाचनमा मोरङ क्षेत्र नम्बर ६ बाट निर्वाचित सांसद हुन् ।

जनसंख्या तथा वातावरण मन्त्री बनेका पण्डितले आफूले पाएको जिम्मेवारी सिंहजस्तै नडराईकन पुरा गर्ने प्रतिबद्धता व्यक्त गरेका छन् । मन्त्री पण्डितसँग दैनिक नेपालका लागि हेम रोकाहाको कुराकानी :

आज विहानसम्म तपाई मन्त्री हुने कुरा थिएन, तपाईलाई मन्त्री हुँदैछु भन्ने केही जानकारी थियो र ?

थिएन । अपर्झट खवर आयो । हतार हतारमा आएर सपथ लिएको हुँ ।

दोस्रोपटक मन्त्री हुनुभा’को छ, कस्तो महशुस भैरा’छ ?

प्रधानमन्त्री केपी ओलीजीले विश्वास गर्नुभयो, पार्टीले विश्वास गर्‍यो । म यसमा सन्तुष्ट छु ।

तपाईंले त गृहमन्त्री ताक्नुभा’थ्यो, जनसंख्या तथा वातावरण मन्त्री हुनुभयो । कस्तो लागिरा’छ ?

जुन मन्त्री भएपनि काम गर्ने हो । मैले जनसंख्या तथा वातावरण मन्त्री भएर पनि राम्रो काम गर्न सक्छु । अब कामको थालनी हुन्छ । यसै मन्त्रालयबाट मैले परिणाममुखी काम गर्न सक्छु ।

तपाईंलाई त कडा स्वभावको मन्त्री भन्छन् नि ?

काममा कडा कि नाममा ? ….. म इमान्दारीपूर्वक काम गर्छु । गलत कुरासँग नझुकिकन सिंहजस्तै नडराई आफूले पाएको जिम्मेवारी पुरा गर्छु । त्यत्ति हो ।

वातावरण मन्त्रीको रुपमा तपाईंको प्राथमिकता के हुनेछ ?

वातावरणमैत्री, मानवमैत्री तथा जनसंख्याको नियन्त्रण गर्ने जुन नीति छ त्यसलाई प्रभावकारिताका साथ अघि बढाउने मेरो काम हुनेछ ।