संघीय फोरमका नेता अशोक वर्माले राजीनामा दिए, उपेन्द्र यादवलाई धक्का

बुटवल, १३ चैत । संघीय समाजवादी फोरम नेपालका अध्यक्ष उपेन्द्र यादवले रुपन्देही जिल्ला कार्यसमितिमा ठाडो हस्तक्षेप गरेर ‘यादव’ जातीको बर्चश्व बनाएको भन्दै संगठन गर्दै आएका युवा नेता अशोक वर्माले सदस्य पदबाट राजीनामा दिएका छन् ।

युवा नेता वर्माले जिल्ला अध्यक्षलाई सम्बोधन गरेर रुपन्देही जिल्ला कार्यसमितिको सदस्यबाट राजीनामा दिएका हुन् । वर्माको राजीनामाले केन्द्रसम्म हलचल मच्चाएको छ । उपेन्द्र यादवलाई राजीनामा प्रकरणले तानव उत्पन्न भएको स्रोतको भनाइ छ ।

युवा नेता वर्माले राजीनामा पत्रमा भनेका छन्, ‘रुपन्देही जिल्ला कार्यसमितिभित्र नातावाद, कृपावाद तथा एकल जातीको नीति कायम भएकोले बुटवल क्षेत्र नम्बर ४ को अध्यक्ष रहने गरी बाँकी अन्य पदबाट राजीनामा दिएको जानकारी गराउँछु’

रुपन्देही जिल्लाको महाधिवेशनमा ठाडो हस्तक्षेप भएको भन्दै वर्मासहितका युवा नेताहरूले बन्दसत्रमा नारावाजी गर्दै बहिष्कार समेत गरेका थिए । वर्मासहितका युवाहरूले बन्दसत्र बहिष्कार गरेपछि अध्यक्ष उपेन्द्र यादवले विवादलाई थामथुम पार्ने प्रयास गरेका थिए ।

पार्टीभित्र विशेष गरेर यादव जातीको बर्चश्व रहेको भन्दै रुपन्देहीमा विद्रोह भएपछि उपेन्द्र यादव संकटमा परेका छन् । यस्तै विद्रोह अरु जिल्लामा पनि हुने तयारीमा रहेको एक नेताले बताए ।