निर्वाचन केन्द्रीत अभियानमा जुट्न एमाले नेता केसीको कार्यकर्तालाई निर्देशन

बागलुङ, १० चैत । नेकपा एमाले केन्द्रीय उर्जा विभागका सदस्य हिराबहादुर केसीले बैशाख ३१ गतेका लागि तोकिएको निर्वाचन केन्द्रीत अभियानमा सक्रिय भएर लाग्न सम्पूर्ण नेता कार्यकर्तालाई आव्हान गर्नु भएको छ ।

नेकपा एमाले काठेखोला गाउँपालिका वडा नंं ३ (साविक धम्जा गाविस) मा बिहीवार आयोजित अगुवा कार्यकर्ता भेलालाई सम्बोधन गर्दै केसीले यस्तो बताउनु भएको हो ।

देशको मुल राजनीति एमालेको नीति अनुसार चलेको र राजनीतिको केन्द्रभागमा एमाले नै भएको दावी गर्दै केसीले एमालेले सरकारमा रहदा र विपक्षमा बसेर गरेका जनप्रिय कामका बारेमा आम जनतालाई सचेत गराउन सम्पूर्ण पार्टी पंक्ति लाग्नु पर्नेमा जोड दिनुभयो ।

कार्यक्रममा नेकपा एमालेका जिल्ला सदस्य तथा धम्जा इन्चार्ज अमरबहादुर थापाले आर्थिक विकास र सामाजिक रुपान्तरणका लागि स्पष्ट एजेण्डाका साथ अगाडि बढेको एमालेको नेतृत्व आवश्यक रहेको धारणा राख्नु भएको थियो ।

भेलाले स्थानीय निर्वाचन केन्द्रीत कार्ययोजना निर्माण गर्नुका साथै साविक धम्जा गाविसका सबै वडालाई टोल कमिटि कायम गरी निर्वाचन परिचालन अभियान सञ्चालन गर्ने निर्णय गरेको छ ।

निर्वाचनका लागि जिल्ला पार्टीले बनाएको योजना अनुसार काठेखोला गाउँपालिकाको केन्द्र सुल्डाडामा चैत १२ गते हुने आम सभालाई सफल पार्न वडा कमिटिको सक्रियता बढाउने लगायतका निर्णय गरेको एमालेका वडा अध्यक्ष यामबहादुर श्रीसले जानकारी दिनुभयो ।