
विजय थापा, अमेरिका । अमेरिकामा राष्ट्रपतीय निर्वाचनको रन्को जारी छ । जति कम बोल्यो त्यति गल्ती कम ,जति ज्यादा बोल्यो त्यति ज्यादा गल्ती हुने सम्भावना हुन्छ भन्ने भनाइ छ । रिपब्लिकन दलका राष्ट्रपतिका प्रत्यासी डोनाल्ड ट्रम्प छिटो र धेरै कुराहरु अभिव्यक्ति दिन सक्ने भएका कारण बारम्बार विवादमा आउने गर्छन् ।
कयौँपटक उनले बोलेका कुराहरुलाई ज्यादा दबाब आएपछि संचारमाध्यममार्फत माफी माग्छन्। आगामी नोभेम्बर ८ तारिखमा हुने राष्ट्रपतिय चुनावी मुखमा फेरि एकपटक नराम्रो संग उनको थुतुनोको कारण विवादको भुमरीमा जकडिएका छन् ।
उनले सन् २००५ मा महिलालाई अश्लिल शब्द प्रयोग गरिएको भिडियो वाशिंगटन पोस्टले सार्बजनिक गरि दिएपछि ट्रम्प ठूलो संकटमा पर्ने सम्भावना देखिएको छ ।
अमेरिकाको राष्ट्रपति जस्तो गरिमामय पदमा उम्मेवारले यस्तो तल्लोस्तरको घटिया शब्द प्रयोग गरेका कारण अमेरिकाको राजनीतिमा ठूलो भूकम्प ल्याइदिएको छ । संचारमाध्यममा जताततै उनको भिडियो आएपछि केवल महिलाहरुले मात्र आक्रोश पोखिरहेका छैनन्, यत्रतत्र नकारात्मक टिकाटिप्पणी भइरहेका छन् ।
ट्रम्पले संचार माध्यमबाट आममाफी माग्दै ‘म पूर्ण मानिस हैन्’ भनेर माफी मागेपनि अझ यो मुद्दा व्यापक बन्दै गएको छ । महिलाप्रति राखेको दृष्टिकोणले उनको चुनाव प्रचारप्रसारलाई ठूलो थप्पड लागेको छ । डरलाग्दो उथलपुथल ल्याउने सम्भावना देखिएको छ । अमेरिकाको राष्ट्रपतिका उम्मेदवारका विषयमा यस्ता बिबादास्पद बिषयबस्तुहरु बाहिर आएपछि अमेरिकामा जनता तथा मतदाताले गम्भीर रुपले लिने गर्छन । यसैले ट्रम्पले अथाह चुनौतीको सामना गर्नुपर्ने हुन्छ ।
ट्रम्पले महिलालाई अत्यन्तै तुच्छ शब्द प्रयोग गरेका छन, जुन कुनै पनि महिलाले सुन्न हिम्म्मत गर्नुपर्ने हुन्छ । अमेरिकामा उनले प्रयोग गरेका निम्न कोटीका शब्दहरु पारिवारिक जमघटमा सुन्नलायक छैनन् भनि लाखौ पृष्ठपोषण र प्रतिक्रिया आइरहेका छन् । अत्याधिक दर्शक, श्रोता, अमेरिकन तथा बिश्वका जनताले यस्ता शब्दहरु आफ्ना सन्तानसँग कसरी सुन्न सक्ने ? भनी प्रतिक्रिया दिएका छन् ।
ट्रम्पले सन् २००५ मा एक बिबाहित महिलासँग शारीरिक सम्पर्क गर्न चाहेको र शारीरिक रुपमा केही हर्कत गरेको भिडियोमा प्रष्टै देखिएको छ । ट्रम्पले तल्लोस्तरको अपशब्द प्रयोग गर्दै महिलाका संबेदनशील अङ्गको बारे नानाभाँती बोलेका हुन् । यो भिडियो ट्रम्पले तेश्रो श्रीमतीकी रुपमा बिहे गरेकी अहिलेकी जीवनसंगिनी मेलानियासंगको बिहेको एक महिनापछि गरेको वाशिंगटन पोस्टले लेखेको छ ।
उक्त भिडियोमा ट्रम्पले भनेका छन् – ‘प्रसिद्ध व्यक्तिका लागि महिलाले जे पनि गर्न दिन्छन् । तिमी मलाईलाई जे पनि गर्न सक्छौ । म ख्याति प्राप्त व्यक्ति हुँ । त्यसकारण म महिलाको गोप्य अंग पक्रन सक्छु ।’
ट्रम्पको यो भिडियो सार्वजनिक भएपछि डेमोक्र्याटिक पार्टीका तर्फबाट उम्मेदवार बनेकी हिलारी क्लिन्टनले जित्ने सम्भावना निकै बढेको छ । हिमारीको चुनावी प्रचारप्रसार टिमले ट्रम्मले महिलालाई गरेको अपमान तथा तुच्छ बनाउने गरि प्रयोग गरिएको अपशब्दको पर्दाफासल उनी अयोग्य छन् भनी दाबी गर्दै व्यापक प्रचारप्रसार गरिरहेका छन् ।
रिपब्लिकन अनि असन्तुष्ट
सभामुख पउल रायनले ट्रम्मको घृणास्पद कुरामाथि टिप्पणी गरेका छन् । गत शुक्रबार रिपब्लिकनका हस्तीहरु उनी माथि यसरी खनिए कि विस्कनसिन राज्यमा हुने कार्यक्रममा समेत ट्रम्पलाई बोलाइएन । सभामुख रायनले नै ट्रम्मलाई नआउनु भनेको सीएनएनले लेखेको छ ।
पूर्वराष्ट्रपतिका उम्मेदवार मिट रोमनीले एक बिबाहित महिलालाई आक्रमण भन्दै प्रश्न गर्दै ‘यस्तो घिनलाग्दा शब्दले हाम्रा जीवनसंगिनी तथा हाम्रा छोरीहरुको अपमान भएको’ भन्दै खेद प्रकट गरेका छन् ।
यसैगरी जन मेकनले यो भिडियोको परिणाम ट्रम्पले भोग्नेछन् भनि लेखेका छन् । ट्रम्पको लम्पट टिप्पणीप्रति कुनै माफ नहुने भन्दै उनले कुनै पनि महिला पीडित हुँन नहुने बताएका छन् ।
ट्रम्मका उपराष्ट्रपतिका उम्मेद्वार माइक पेन्सले उनका बारेमा टिप्पणी गर्न चाहेनन् । यसैगरी उताह राज्यका सभासदले ट्रम्मलाई समर्थन फिर्ता लिएका छन् । रिपब्लिकन दलका थुप्रै हस्तीहरुले ब्यापक बिरोध गरेका छन् । न्युह्याम्प्सायरका सिनेटर तथा ट्रम्मका कट्टर आलोचक केली अयोटा तथा पूर्वराष्ट्रपतिका उम्मेदवार जेब बुसले सामाजिक सञ्जाल ट्वीटरबाट ट्रम्पको आलोचना गरेका छन् ।
भनिन्छ्, राजनीतिमा रातारात पासा पल्टिन्छ । यो भिडियो सार्बजनिक हुनुले ट्रम्पलाई निकै डरलाग्दो सङ्कट निम्त्याइ दिएको छ । डोनाल्ड ट्रम्पले आफैले भनेका छन् – यो गलत थियो र म खेद प्रकट गर्छु ।
तर, यसलाई अमेरिकन जनताले क्षमा गर्छन या गर्दैन् ? त्यो भबिष्यको कुरा हो । क्षम्य हुने बिषयवस्तु हो या हैन ? आगामी नोभेम्बर ८ तारिखमा हुने राष्ट्रपतिको निर्वाचनमा ‘हाम्रो मान्छे भन्दा राम्रो मान्छे’ ल्याउने निर्णय अमेरिकन जनताको हातमा निर्भर रहने छ । अमेरिकन संचारमाध्यममा लगातार ट्रम्मले बोलेको भिडियो सार्बजनिक निरन्तर रुपमा भैरहेको छ ।
भिडियो हेर्न यहाँ क्लिक गर्नुहोस्
https://www.youtube.com/watch?v=t7PM9kwFwnc











प्रतिक्रिया