अनुशासनहीन कर्मचारीलाई कारबाही गर्न प्रधानमन्त्रीको निर्देशन

काठमाडौं, १८ भदौ । कार्यालय समयमा जनताको समस्या समाधान गर्नुपर्ने सरकारी कर्मचारी नै तास खेलेर बसेको भन्ने समाचार प्रकाशित भएपछि प्रधानमन्त्री तथा मन्त्रिपरिषद् कार्यालयले त्यस्ता कर्मचारीलाई कारबाही गर्ने भएको छ ।

प्रधानमन्त्री पुष्पकमल दाहालले शुक्रबार साँझ मुख्य सचिव डा सोमलाल सुवेदीलाई तत्काल छानबिन गरी त्यस्ता कर्मचारीलाई कारबाही गर्न निर्देशन दिनुभएको प्रधानमन्त्री तथा मन्त्रिपरिषद् कार्यालयका सहसचिव दामोदर रेग्मीले जानकारी दिनुभयो ।

प्रधानमन्त्रीले आफू १० बजे कार्यालय खुलेदेखि नै प्रधानमन्त्री कार्यालयमा बसेर जनताको काम गर्ने भन्दै सबै कर्मचारीलाई कार्यालय समयमा उपस्थित रहेर जनताको काम गर्न तथा कुनै पनि गलत काम नगर्न निर्देशनसमेत दिनुभएको छ ।

अर्थ मन्त्रालयको सूचना अधिकारीको कक्षमा कार्यालय समय भित्रै कर्मचारी तास खेल्न व्यस्त रहेको भन्ने समाचार प्रकाशित भएपछि प्रधानमन्त्रीले उक्त निर्देशन दिनुभएको हो । रासस