बोस्टन, अमेरिका । हास्य कलाकार सिताराम कट्टेल (धुर्मस) र कुन्जना घिमीरे (सुन्तली)को एकीकृत बस्ती निर्माण अभियानलाई अमेरिकाको बोस्टनमा रहेका तामाङहरुले ६ लाख आर्थिक सहयोग गरेका छन् ।
बोस्टन तामाङ समाजका अगुवा सुवास तामाङ ‘गोले’को संयोजकत्वमा संकलन गरिएको उक्त रकम मानिक लामा, बिजय तामाङ, प्रेम तामाङ लगायत बोस्टनमा रहेका मनकारी तामाङ समुदायले सहयोग गरेका हुन् ।
उक्त रकम २८ मइका दिन बोस्टनबाट विजय तामाङ र जितेन्द्र श्रेष्ठले सिताराम कट्टेल र कुन्जना घिमीरेको नाममा प्रभुमनि ट्रान्सफरबाट पठाइएका हुन् ।
भूकम्पपछिको पुनर्निर्माणमा स्वस्फुर्तरुपमा लागिरहेका हास्य कलाकार धुर्मस सुन्तलीले यसअघि काभ्रेको डाँडा गाउँमा भूकम्पपीडितका लागि विभिन्न संघ संस्था र मनकारी व्यक्तिहरुको आर्थिक तथा भौतिक सहयोगमा एकीकृत नमुना बस्ती बनाइसकेका छन् ।
हाल उनीहरुले मेलम्ची ८ को गिरान्चौरमा एकीकृत बस्ति अभियान स्वरुप ६५ घर निर्माणमा लागेका छन् । एक घर, एक धारो, एक चर्पी, एक बगैचा लगायतको संरचना निर्माण गरेर भूकम्पपीडित स्थानीयलाई हस्तान्तरण गरिने पनि जनाइएको छ ।
उनीहरुले यस अभियानमा आर्थिक तथा भौतिक सहयोग गर्न पनि देश तथा विदेशमा रहेका नेपालीहरुलाई अनुरोध गरेका छन् ।
यस्तो छ पठाइएको रकमको स्टेटमेन्टः
प्रतिक्रिया