काठमाडौं, १८ वैशाख । ‘भाग्यले बाँचेकाहरु’ डकुमेन्ट्रीका निर्देशक गणेश पाण्डे सम्मानित भएका छन् ।
शनिबार नेकपा एमालेको लमजुङ-काठमाडौं सम्पर्क मञ्चले राजधानीमा आयोजना गरेको नयाँ वर्ष २०७३ को शुभकामना आदानप्रदान कार्यक्रममा विनाशकारी भूकम्पमा बाँचेकाहरुको कथालाई समेटेर तयार पारिएको डकुमेन्ट्रीले देश विदेशमा अवार्ड जितेर लमजुङ र नेपालको शिर उचो बनाएको भन्दै लमजुङ निवासी पाण्डेलाई सम्मान गरेको हो ।
कार्यक्रममा नेकपा एमालेका स्थायी समिति सदस्य छविलाल विश्वकर्मा, किसान महासंघका उपमहासचिव डिबी कार्की र मञ्चका अध्यक्ष नन्दराज गुरुङले खादा लगाएर सम्मानपत्र प्रदान गरे ।
दैनिक नेपालका प्रधान सम्पादक समेत रहेका पाण्डेको उक्त डकुमेन्ट्रीले ६ वटा देशमा अन्तर्राष्ट्रिय अवार्ड जितिसकेको छ भने ३२ देशमा सहभागी भएको छ । डकुमेन्ट्रीमा विनाशकारी भूकम्पमा बाँचेकाहरुको कथा रहेको छ ।
सम्मान ग्रहण गर्दै निर्देशक पाण्डेले यो सम्मानले आगामी दिनमा अझै राम्रो काम गर्न प्रोत्साहन गरेको बताए ।
प्रतिक्रिया