धनगढी, २ वैशाख । डोटीमा मङ्लबार राति भएको जिप दुर्घटनामा परी निधन भएका पाँचै जनाको आज कैलालीको गोदावरी घाटमा सामूहिक अन्त्येष्टि गरिएको छ ।
दुर्घटनामा परी निधन भएका पद्मकन्या क्याम्पसका प्रा डा जयराज पन्त, उहाँकी धर्मपत्नी गुड्डी, भाइ बुहारी सावित्रा, भाइ केशव र काका डा गणेशराज पन्तको सामूहिक अन्त्येष्टि गरिएको हो । गुड्डी र सावित्रासमेत सोही क्याम्पसमा प्राध्यापन गर्नु हुन्थ्यो ।
डोटीबाट बसाइँ सरेर कैलालीमा बसेका परिवारका सदस्यले मृतकको शव बुझेर बुधबार साँझ कैलाली ल्याएका थिए । डोटीको जिजोडामाडौँ गाविसमा भएको उक्त जिप दुर्घटनामा चालकसहित डोटीकै अन्य तीन जनाको पनि मृत्यु भएको थियो ।
यसैबीच, डोटेली लोक संस्कृतिसहित दुई विषयमा विद्यावारिधि गर्नु भएका डा जयराजको निधनले डोटेली लोक साहित्यमा अपुरणीय क्ष्यति पुगेको भन्दै यस क्षेत्रका स्रष्टाले गहिरो चिन्ता व्यक्त गरेका छन् । साहित्यकारसमेत रहनुभएका डा पन्तका विभिन्न कृति प्रकाशित छन् ।
डोटीमा शैक्षिक संस्था स्थापना गर्न स्वर्गीय पन्तले परिवारको नेतृत्वदायी भूमिका निर्वाह गर्दै आउनुभएको थियो । रासस
प्रतिक्रिया