भक्तपुर, १७ चैत । एमाओवादीका प्रवक्ता दीनानाथ शर्माले वर्तमान सरकारको काम कछुवाको गतिजस्तै अगाडि बढेको बताउनुभएको छ ।
रफत सञ्चार क्लबले आज यहाँ आयोजना गरेको साक्षातकार कार्यक्रममा उहाँले वर्तमान सरकारको काम कारबाही प्रभावकारी नभएको भन्दै सरकारले जनताको हितमा काम गर्न नसकेको धारणा राख्नु भयो ।
उहाँले काँग्रेस महाधिवेशनपछि सरकार परिवर्तनको विषय हल्लामात्र भएको बताउँदै यही सरकारलाई राष्ट्रिय सरकारको स्वरुप प्रदान गर्दै काँग्रेसलाई समेत सरकारमा सामेल गराउन शीर्ष नेता लागिपरेको बताउनुभयो ।
मधेस आन्दोलनका जायज मागका सम्बोधन नगरे स्थानीय निकायको निर्वाचन असफल हुने भन्दै उहाँले सङ्घीयता र सीमाङ्कनको टुङ्गो नलगाएसम्म स्थानीय निकायको निर्वाचन सम्भव नरहेको टिप्पणी गर्नुभयो ।
प्रवक्ता शर्माले सरकारले कालो बजारीलाई नियन्त्रण गर्न असफल भएको आरोप लगाउँदै नेपाल आयल निगम र सरोकारवालाले नै इन्धनको अभाव सिर्जना गरेको र सरकार मुकदर्शक मात्र बनेको बताउनुभयो । रासस
प्रतिक्रिया