मोदीको गृहनगर गुजरात पुगेका प्रधानमन्त्री ओली भावुक भएपछि…

गुजरात (भारत), ११ फागुन । स्थानीय भुजवासीले आत्मीय र भव्य स्वागत गरेपछि राजकीय भ्रमणमा रहनुभएका प्रधानमन्त्री केपी शर्मा ओली पनि सायद भावुक हुनुभयो ।

उहाँलाई स्वागत गर्न भूकम्पपछि पुनःस्थापना गरी पुनःनिर्मित एक सामुदायिक भवनमा खचाखच मानिसको उपस्थितिमा उहाँले गुजरातको स्वागतलाई असाधारण भन्नुभयो ।

भारतीय प्रधानमन्त्री नरेन्द्र मोदी दुईपटक मुख्यमन्त्री भएको सो प्रदेशमा ओली हिँड्ने बाटाका दुवैतिर दुई देशका झन्डासहित स्थानीय उभिएका थिए भने सडकका खम्बा र भित्तामा दुई प्रधानमन्त्रीका तस्बिर र स्वागतका तुल टाँगिएका थिए । स्वागतको संस्कार पनि नेपालीको जस्तै देखिन्थ्यो । प्रधानमन्त्री ओलीले आफू त्यो प्यार र मित्रताको ऋणी भएको बताउनुभयो ।

उहाँले भन्नुभयो– “मैले शान्तिदूत बुद्धको सन्देश, पशुपतिको प्रसाद र आशीर्वाद लिएर आएको छु, तपाईंहरुको सफल र प्रेरक पुनःनिर्माण कार्यबाट प्रभावित भएको छु, तपाईंहरुको भलो होस्, हाम्रो मित्रता गाढा होस् ।”

ओलीले दुई देशबीचको मित्रता कसैले बनाइदिएको नभएर आफैँ बनेकाले यसलाई कसैले बिगार्न पनि सक्दैन भन्नुभयो । आफ्नो भ्रमणबाट केही समययताको तिक्ततासमेत हटेको उहाँले स्पष्ट गर्नुभयो । रासस