फुटबलको जितमा सरिक हुँदै प्रधानमन्त्री ओलीले भने, ‘बधाई छ खेलाडीहरू’

काठमाडौँ, ४ फागुन । प्रधानमन्त्री केपी ओलीले १२औँ दक्षिण एसियाली खेलकुद (साग)को पुरुष फुटबलमा उपाधि जितेकामा नेपाली राष्ट्रिय टिमलाई बधाई एवम् शुभकामना दिनुभएको छ ।

प्रधानमन्त्रीले साग खेलकुदमा २३ वर्षपछि प्राप्त जितले नेपालको शिर उचो बनाएको भन्दै खेलाडी, प्रशिक्षक एवम् खेलसँग सम्बन्धित सबै सरोकारवाला पक्षलाई आफ्नो व्यक्तिगततर्फबाट र सरकारको तर्फबाट एक विज्ञप्ति जारी गरी बधाई दिनुभयो ।

उहाँले भन्नुभएको छ – “नेपाली खेलाडीको यो विजय खेल इतिहासमा अनन्तकालसम्म स्मरणीय हुनेछ । सरकारले खेलाडीको सम्मानमा कुनै कमी आउन दिने छैन ।”

प्रधानमन्त्रीले सागको महिला फुटबल टिम पनि फाइनलसम्म पुग्न सफल भएकामा बधाई दिँदै आगामी दिनमा अझै राम्रो तयारी गर्न सुझाव दिनु भएको छ ।

साथै सागमा स्वर्ण, रजत र काँस्य पदक विजेता खेलाडीलाई पनि प्रधानमन्त्रीले बधाई दिनुभएको प्रधानमन्त्रीका प्रेस संयोजक चेतन अधिकारीद्वारा जारी विज्ञप्तिमा जनाइएको छ । रासस