काठमाडौं, २ माघ । प्रमुख तीन दलले सीमांकन तीन महिनाभित्र टुंग्याउने सहमति गरेका छन् ।
शनिबार प्रधानमन्त्री निवास बालुवाटारमा बसेको नेपाली कांग्रेस, एमाले र एमाओवादीका शीर्ष नेताको बैठकले आन्दोलनरत मधेसी मोर्चाको सहमतिमा राजनीतिक संयन्त्र गठन गरेर तीन महिनाभित्र सीमांकन टुंग्याउने निर्णय भएको कांग्रेस उपभापति रामचन्द्र पौडेलले जानकारी दिनुभयो ।
उहाँले भन्नुभयो- ‘राजनीतिक संयन्त्रलाई संवैधानिक हैसियत दिएर गठन गर्ने र तीन महिनाभित्र सीमांकन टुंग्याउने निर्णय भएको छ । मोर्चाकै सहमतिमा संविधान संशोधन विधेयक पारित हुन्छ ।’
उहाँका अनुसार माघ ५ गते बस्ने संसद बैठकबाट मधेसी मोर्चालाई विश्वासमा लिएर संविधान संशोधन गर्ने निर्णय समेत भएको छ । कार्यदलमा रहेका सदस्यहरुले मधेसी मोर्चाको पछिल्लो माग बारे आजको बैठकमा जानकारी गराएपछि यस्तो निर्णय लिइएको हो ।
प्रमुख तीन दल-मोर्चा कार्यदलको बैठक आज दिउँसो ३ बजे बस्दै छ ।
प्रतिक्रिया