काठमाडौं, २७ मंसिर । नेपालका लागि भारतीय राजदूत रणजित रायले आफ्नो राजनीतिक भेटवार्ता र परामर्शहरूलाई बाक्लो बनाउँदै लगेका छन् । उनले दैनिक सरह विभिन्न दलका नेता तथा सांसदहरूसँग भेट गर्दै आएको स्रोतले जनाएको छ ।
यसै क्रममा राजदूत रायले शनिबार अपरान्ह मधेसी मोर्चाका दोस्रो तहका नेताहरूलाई पनि भेट गरेका छन् । उनले त्यस क्रममा मधेसी मोर्चाले उठाएका माग र भारतमा परराष्ट्रमन्त्री कमल थापाले गरेको चार बुँदे सम्झौताका विषयमा जिज्ञासा राखेको स्रोतले जनाएको छ ।
संसदमा भारतीय राजदूत रायलाई देश निकाला गर्न माग उठीरहेका बेला रायले भने धमाधम राजनीतिक भेटवार्ता गर्दै आएका छन् ।
राजदूत रायले कांग्रेस नेतासँग भएको भेटको प्रसंग उप्काउँदै सुशील कोइराला नेतृत्वको सरकारले अगाडि बढाएको संविधान संशोधन विधेयक पारित गर्नेबारे उनीहरूको धारणा जान्न चाहेका थिए ।
जवाफमा तमलोपा उपाध्यक्ष त्रिपाठीले भूकम्पपीडितलाई राहत दिलाउन र मानवीय हिसाबले कांग्रेस नेताहरूकै आग्रहमा पुनर्निर्माण विधेयक पारित गर्न सहमति दिएको बताएका थिए ।
तर, त्यसलाई कांग्रेसले मोर्चाको कमजोरी ठानेर फाइदा उठाउन खोजेको र त्यो आफूहरूलाई स्वीकार्य नरहेको त्रिपाठीले बताएको स्रोतले जनाएको छ ।
अरू मधेसी नेताले ११ बुँदे माग आफ्नो बटमलाइन भएको भन्दै त्यसका आधारमा सहमति गरी प्याकेजमै संविधान संशोधन हुनुपर्ने अडान राजदूत रायसँग राखेको भेटमा सहभागी एक नेताले जानकारी दिए ।
राजदूत र मोर्चा नेताबीच करिब १ घण्टा कुराकानी भएको थियो । त्यसक्रममा राजदूत रायले नयाँदिल्लीमा परराष्ट्रमन्त्री कमल थापाका तर्फबाट प्रस्तुत चारबुँदे साझा धारणाबारे पनि मोर्चा नेतासँग छलफल गरेका थिए ।
स्रोतका अनुसार राजदूत रायले नाकाबन्दी खोल्ने औपचारिक घोषणा गर्नसमेत मधेसी मोर्चासँग आग्रह गरेका थिए । तर, उनीहरूले आन्दोलनको ’फेस सेभिङ’का लागि सरकार र प्रमुख प्रतिपक्षी दल कांग्रेस जिम्मेवार हुनुपर्ने जवाफ दिएको बुझिएको छ ।
भारतीय राजदूत रणजित रायसँगको भेटका लागि लैनचौरस्थित राजदूतावास छिर्नेमा संघीय समाजवादी फोरम उपाध्यक्ष लालबाबु राउत, शिवजी यादव, तमलोपा उपाध्यक्ष हृदयेश त्रिपाठी, महामन्त्री सर्वेन्द्रनाथ शुक्ल, सद्भावना सहअध्यक्ष लक्ष्मणलाल कर्ण र महासचिव मनीषकुमार सुमन तथा तमसपा वरिष्ठ नेता रामनरेश राय यादव थिए ।
प्रतिक्रिया