एमाले नेता विजय पौडेलद्धारा पदबाट राजीनामा, अख्तियारको छानविनका लागि तयार

काठमाडौं, २४ मंसिर । नेकपा एमालेका पोलिटब्युरो सदस्य विजय पौडेलले पदबाट राजीनामा दिनुभएको छ ।

अख्तियार दुरुपयोग अनुसन्धान आयोगले अकुत सम्पत्ति कमाएको आशंकामा पत्र काटेर छानबिन थालेपछि पौडेलले नैतिकताका आधारमा पदबाट राजीनामा दिनुभएको हो । राजीनामा पछि संक्षिप्त प्रतिक्रियामा उहाँले भन्नुभयो- ममाथि अख्तियारले छानविन गरिरहेको छ । अनुसन्धान सहज होस् र पार्टीलाई असर नपरोस् भनेर राजीनामा दिए ।’

नेकपा एमालेबाट पूर्वसभासद समेत रहनुभएका नेता पौडेलले आजै धुम्बाराही पुगेर अध्यक्ष केपी शर्मा ओलीलाई राजीनामा पत्र बुझाउनुभएको छ ।

उहाँले राजीनामा पत्रमा लेख्नुभएको छ- ‘ममाथि राज्यको संवैधानिक अङ्गबाट नै छानबिन शुरु भैसकेको हुँदा यसको छिनोफानो नहुँदासम्मका लागि पार्टीको पोलिटब्युरोजस्तो गरिमामय पदमा बसिरहन अनुपयुक्त हुनेहुँदा आजैका मितिदेखि लागू हुनेगरी पोलिटव्युरो सदस्यबाट राजिनामा दिएको छु ।’