कैलाली भीडन्तमा वरिष्ठ प्रहरी उपरीक्षकसहित चार प्रहरी मारिए, को-को परे ?

धनगढी, ७ भदौ । कैलालीको टिकापुरमा प्रहरी र आन्दोलनकारीबीच भएको दोहोरो भीडन्तमा परी नेपाल प्रहरीका वरिष्ठ प्रहरी उपरीक्षक (एसएसपी)सहित चार जना प्रहरी मारिएका छन् ।

जिल्ला प्रहरी कार्यालय कैलालीका प्रवक्ता डीएसपी विश्व खड्काले प्रदर्शनले उग्र रूप लिएपछि एसएसपी लक्ष्मण न्यौपाने, इन्सपेक्टर बलराम विष्ट, केशव बोहरा र एसएसपीका गार्डको मृत्यु भएको बताए ।

प्रदर्शनकारीले प्रहरीमाथि घरेलु हतियार भाला र बञ्चरोले आक्रमण गरेका छन् । केही प्रहरीलाई आगो लगाएर मारेका छन् । कैलालीको मुनुवा गाविस ६ सिलम चौराहमा हिंसात्मक झडप भएको हो । ८/१० हजारको संख्यामा रहेका आन्दोलनकारी छुरा, भाला, बन्चरोसहितका हतियार लिएर सडकमा उत्रिएपछि हिंसात्मक झडप भएको हो ।

प्रशासनले लगातार चार दिनदेखि लगाउँदै आएको कर्फयू र निषेधाज्ञा तोड्न खोज्दा भीडन्त भएको हो । जिल्ला प्रशासन कार्यालय टीकापुरले बिहान ११ बजेदेखि बिहान ५ बजेसम्म निषेधाज्ञा जारी गरेको थियो । थारुहट पक्षधरले टीकापुरको चारैतिरबाट निषेधाज्ञा तोड्ने प्रयास गर्दा यस्तो भीडन्त भएको हो ।

आन्दोलनकारीतर्फ ३ जनाको मृत्यु भएको छ भने घाइतेको संख्या सकिन हुन बाँकी छ । अहिले पनि टीकापुर बजारमा दोहोरो झडप भइरहेको छ । त्यहाँ दिउँसो २ बजेदेखि कर्फ्यू लगाइएको छ ।