कलाकार सुनिल थापालाई अमेरिकामा अन्तर्राष्ट्रिय सम्मान दिइदैँ (हेर्नुस् फोटोहरु)

– अनुज थापा

न्युयोर्क, २९ साउन । नेपाली चलचित्र अभिनेता सुनिल थापालाई अमेरिकाको सान फ्रान्सिसको शहरमा लाइफटाइम अचिभमेन्ट अवार्ड दिइदैंछ । उक्त समारोहलाई अविस्मरणिय बनाउनका लागि नेपाली कलाकारहरुले पनि आकर्षक प्रस्तुतिको तयारी गर्दैछन् ।

अगस्ट ७ देखि १६ सम्म जारी फेस्टिभलको आकर्षण ‘फेस्टिभल अफ ग्लोब’ अवार्डमा बलिउड चलचित्र ‘मेरी कोम’मा नायिका प्रियंका चोपडाको बक्सिङ प्रशिक्षकको भुमिका निभाएर आफ्नो अद्धतिय अभिनय क्षमतालाई प्रस्तुत गरेका सुनिल थापालाई उनको चलचित्र क्षेत्रको योगदानलाई कदर गर्दै लाइफटाइम अचिभमेन्ट अवार्ड दिन लागिएको हो । शनिबार दिइने अवार्ड समारोहलाई रोचक बनाउनका लागि नेपाली कलाकारहरुले पनि आकर्षक प्रस्तुति देखाउंदै छन् ।

करिब ७ मिनेट लामो प्रस्तुतिलाई कलाकार शंकर बिसीले कोरियोग्राफी गरिरहेका छन् । बीसीका अनुसार उक्त समारोहमा जहाँ छन् बुद्धका आँखा, कलाकार सुनिल थापाको करियरको उत्कृष्ट नेपाली चलचित्र चिनोको ‘मोहनी लाग्ला है’ भन्ने गीत र माइतीघरको गीत र रेसम फिरिरीको धुनलाई फ्युजन गरेर नायिकाहरु नन्दिता केसी र केकी अधिकारीले प्रस्तुति दिँदैछन् । नायिकाद्वय केसी र अधिकारीले विदेशीभूमिमा पनि यसरी आफ्नो देशका कलाकारलाई सम्मान गरिँदा आफू पनि संलग्न हुन पाएकोमा खुशी व्यक्त गरे । “म निकै नै खुशी छु किनभने आफ्नो देशको कलाकारलाई विदेशी भुमिमा यति ठुलो सम्मान दिइँदैछ र यस सम्मान कार्यक्रममा आफ्नो पनि सानो भुमिका रहँदा मन फुरुंग भएको छ ,” केकीले भनिन् ।

उता अवार्ड पाउन लागेका कलाकार थापाले यसरी अन्तर्राष्ट्रिय मञ्चमा आफू सम्मानित हुन पाउँदा निकै नै खुशी महशुश भएको बताएका छन् । उनले आफ्नो फिल्मी अन्दाजमा भने –“राते काइँलेलाई धेरै नै खुशी लागेको छ ।”
२१ वर्ष लामो इतिहास रहेको यस फिल्मी महोत्सवमा पहिलोपटक नेपाली फिल्म समावेश गराउन प्रमुख भुमिका निभाएका यस फेस्टिभलका ग्लोबल लिडर प्रकाश थापाले नेपाली चलचित्रलाई अन्तर्राष्ट्रिय मञ्चमा पुर्‍याउन फेस्टिभले भुमिका निभाउनेमा आशावादी रहेको बताए ।

फेस्टिभलमा ५ नेपाली फिल्महरु समावेश छन् । जसकुमार राईको स्याक्रिफाइस नेभर डाइज, जोयस पाण्डेको साँघुरो, नरेश देव पन्तको टाटा बाई–बाइ, शंकर घिमिरेको तुलसी र फुलमान वलको सेलफोन चलचित्र महोत्सवमा प्रदर्शन भएका थिए ।

त्यस्तै, कलाकार सुनिल थापासँगै हलिउड कलाकार ज्याकी च्यान र मार्टिन सिन, बलिउड संगितकार–गायक बप्पी लहरी, भियतनामी नायिका किउ चिनलाई पनि सम्मानित गरिदैँछ ।