क्वालालम्पुर, २४ जेठ । मलेसियाको किनाबालु पहाडमा गएको शक्तिशाली भूकम्पमा परी मृत्युहुने मध्येका सिङ्गापुरका सातजना नागरिकको पहिचान खुलेको छ ।
सो भूकम्पमा परी ज्यान जानेमा सिङ्गापुरका नौ जना नागरिकको रहेको बताइएको थियो । यसरी मारिनेमा सातजनाको पहिचान खुलेको मलेसियाली सरकारले आइतबार जनाएको छ ।
उक्त भूकम्पमा परी मृत्युहुने व्यक्तिको सङ्ख्या कम्तीमा पनि १९ पुगेको समाचारमा जनाइएको थियो । त्यसमा परी नौ जना सिङ्गापुरका नागरिक परेका जनाइएको थियो ।
आइतबार पहिचान भएकामा पाँच विद्यार्थी, एकजना शिक्षक र एक पथप्रदर्शक रहेका जनाइएको छ । मलेसियाको सबाह राज्यमा भूकम्पबाट सबैभन्दा बढी क्षति पुगेको बताइएको छ ।
सिङ्गापुरको शिक्षा मन्त्रालयले आइतबार आफ्ना पाँच विद्यार्थी, एकजना शिक्षक र एकजना पथप्रदर्शकले सो भूकम्पमा परी ज्यान गुमाएका जनाएको छ ।
सिङ्गापुरको शिक्षा मन्त्रालयले त्यहाँ हराउनेमा अब दुईजना सिङ्गापुरका नागरिक रहेका जनाएको छ । उनीहरु हराइरहेको र खोजी अभियान जारी नै रहेको बताइएको छ । हराउनेमा अझै एकजना शिक्षक र एक विद्यार्थी रहेका छन् ।
सिङ्गापुरको तान्जोङ कातोङ् प्राथमिक विद्यालयबाट साहसिक पर्यटकका रुपमा सबाह राज्यमा रहेको किनाबलुको एक पहाडमा चढ्न उनीहरु मलेसिया पुगेका थिए । सो पहाडमा भूकम्पले धेरै क्षति पु¥याएको थियो ।
शनिबार अपरान्हसम्म सो पहाडबाट थप शव निकालिएको र मारिनेमामा १९ पुगेको जानकारी एक अधिकारीले शनिबार दिएका छन् । अधिकारीहरूले दक्षिणपूर्वी एसियाको सबैभन्दा ठूलो हिमालमा खोजी कार्य गरिरहेको बताइएको छ ।
एक लोकप्रिय पर्यटकीय हिमाल नजिकै शुक्रबार बिहान ६ रिक्टर स्केलको भूकम्प गएको थियो । यसका कारण ४,०९५ मिटर अग्लो हिमालबाट पहिरो बगेको थियो ।
सिङ्गापुरको उक्त प्राथमिक विद्यालयबाट २९ जना विद्यार्थी र आठजना शिक्षक पनि सो पहाड चढ्न त्यहाँ पुगेका थिए । साहसिक पर्यटकका रुपमा चिनिएको सो पहाडमा गरिने ट्रेकिङ्का लागि एकजना सिङ्गापुरकै पथप्रदर्शक पनि त्यहाँ पुगेका थिए ।
भूकम्प आउँदा उक्त हिमालको चुचुरोमा पुगेका प्रायः मलेसियाली नागरिक भएको र उनीहरूको साथमा सिङ्गापुर, अमेरिका, फिलिपिन्स, बेलायत, थाइल्यान्ड, टर्की, चीन तथा जापानका नागरिक पनि रहेको जानकारी दिइएको छ । रासस/एएफपी
प्रतिक्रिया