धराहरा चढ्न टिकट काटेका यसरी बाँचे

– विश्वास खड्काथोकी

धराहरा ढलिसकेको थियो । इलामका भुप्रसाद बरालले धराहरा ढलेको लामो समयसम्म पनि त्यही धराहरालाई नियालिरहेका थिए । जुन धराहराले दर्जनौँ मानिसको जस्तै झण्डै झण्डै उनको पनि ज्यान लिएको थियो । उनी कहिले उद्दारको लागि खटिन्थे, त कतिबेला मानिसहरुको बीचमा आफू मृत्युको मुखमा पुगेर पनि बाँचेको वास्तविकता सुनाइरहेका थिए ।

उनी इलामबाट काठ्माडौं आएको चार दिन भएको थियो । उनको छोरी काठमाडौंमै अध्ययन गर्ने भएकाले उनी छोरीको कोठामा बसेका थिए । कहिल्यै धराहरा नचढेका भुप्रसादलाई बल्ल तल्ल राजधानी आएको मेसोमा धराहरा चढ्ने मोह जाग्यो । शनिवारको मौका छोपी भुप्रसाद छोरीसँग धराहरा पुगे र टिकट पनि लिए । तर धराहरा भने चढ्न पाएनन् ।