काठमाडौं, १६ फागुन । निधेषित क्षेत्रमा आन्दोलनकारी प्रवेश गर्न खोजेपछि राजधानीको नयाँ वानेश्वरमा प्रहरी र आन्दोलनकर्ता एकीकृत नेकपा माओवादी नेतृत्वको ३० दलिय मोर्चाका कार्यकर्ताबीच झडप भएको छ ।
एमाओवादी नेता नरायणकाजी श्रेष्ठको नेतृत्वमा तीनकुनेबाट निस्केको जुलुसले निषेधित क्षेत्र तोडेपछि प्रहरीले हस्तक्षेप गरेको हो । प्रहरीको हस्तक्षेपपछि आन्दोलनकारीले प्रतिवाद गर्न खोज्दा मोर्चाका कार्यकर्ताको सुरक्षामा खटिएका प्रहरीसँग झडप भएको थियो ।
झडपमा एमाओवादी प्रचण्डकी पुत्री रेणु दाहालसचित दर्जन बढी प्रदर्शनकारी घाइते भएका छन् । नयाँ बानेश्वरमा सरकारले निषेधित क्षेत्र भन्दै आवतजावतमा रोक लगाएको थियो ।
निषेधित क्षेत्रमा आन्दोलनकारीले प्रवेश गरेपछि प्रहरीले लाठी र अश्रु ग्यास प्रहार गरेको छ । झडपमा दुवै पक्ष प्रदर्शनकारी र प्रहरी घाइते भएका छन् ।
टुँडिखेलस्थित खुलामञ्चतर्फ हिडेँको जुलुसलाई प्रहरीले तिनकुनेस्थित बस् स्टपमै रोकेपछि झडपको स्थिति सृजना भएको थियो । स्थिति नियन्त्रण गर्न प्रहरीले पानीको फोहोरा र लाठी चार्ज समेत गरेको थियो ।
अहिले पनि नयाँबानेश्वर क्षेत्र तनावग्रस्त छ । स्थिति सामान्य बनाउन थप प्रहरी परिचालन गरिएको छ । झडपपछि आन्दोलनकारीले नारावाजी गरेका छन् । अहिले टुँडिखेलस्थित खुल्ला मञ्चमा एमाओवादी मोर्चाको कार्यक्रम सुरु भइसकेको छ ।
यो पनि पढ्नुस:
नारायणकाजीले झुक्याएकाले बानेश्वरमा झडप, हेर्नुस घाइतेहरुको हालत ! (फोटो फिचरसहित)
प्रतिक्रिया