गौशाला, २३ माघ । महोत्तरीको प्रकौली गाविस– ५ स्थित एक पोखरीमा गएराति अज्ञात समूहले विषादी हालिदिँदा पाँच लाख मूल्य बराबरको माछा नष्ट भएको छ ।
प्रकौली– ५ बस्ने बजरङ्ग यादवको पोखरीमा गएराति अज्ञात समूहले विषादी हालिदिँदा करिब छ क्विन्टल माछा नष्ट भएको जिल्ला प्रहरी कार्यालय महोत्तरीले जनाएको छ ।
करिब एक बिगाहा क्षेत्रफल रहेको सो पोखरीमा पालिएको रहु, भकुरा, बोवारी, नैनी, कमल, ग्राँसकाँटलगायतका माछा नष्ट भएको यादवले बताउनुभयो ।
पीडित यादवले पोखरीमा विषादी हाल्ने समूहलाई समातेर कडाभन्दा कडा कानुनी कारबाहीको लागि प्रहरीसमक्ष अनुरोध गर्नुभयो ।
जिल्ला प्रहरी कार्यालय महोत्तरीका प्रहरी नायब उपरीक्षक लोकेन्द्र श्रेष्ठले पोखरीमा विषादी हालेको समूहको खोजी भइरहेको बताउनुभयो ।
प्रतिक्रिया