गृह जिल्लामै ओलीको पुत्ला दहन, माफी माग्न माग

लक्ष्मी काफ्ले
बिर्तामोड, २४ पुस । मधेशी जनताको भावनामा ठेस पुग्ने गरी अभिव्यक्ति दिएको भन्दै मधेशी दलका नेताहरुले बिहीवार नेकपा एमालेका अध्यक्ष केपी शर्मा ओलीको गृहजिल्लामै पुत्ला दहन गरेका छन् ।बिर्तामोडको मुक्तिचोकमा उनीहरुले पुत्ला दहन गरेका हुन् । पुत्ला दहनपछि विरोधसभालाई तमलोपाका केन्द्रीय सदस्य त्रिनारायण राजवंशी र सद्भावना पार्टीका जिल्ला अध्यक्ष सूर्यनारायण गणेशले सम्बोधन गरेका थिए । फोरम नेपालकी कोषाध्यक्ष संगीता रौनियारका अनुसार ओलीले मधेशी दलका नेतासँग माफी माग्नुपर्ने र माफी नमागेसम्म सत्तापक्षीय दलहरुले आमन्त्रण गर्ने बार्ता र छलफल बहिष्कार गर्ने मधेशी दलको निर्णय छ ।

ओलीको पुत्ला दहनमा तमलोपा, फोरम लोकतान्त्रिक, फोरम नेपाल, फोरम गणतान्त्रिक, तमरा अभियान, सद्भावना, कोचिला संघर्ष समिति, कोचिला गाभुर फ्रन्टको तर्फबाट सहभागिता रहेको थियो ।