चितवन, ७ पुस । दक्षिण चितवनको माडी नगरपालिकामा भएको छुट्टाछुट्टै घटनामा दुईजनाको मृत्यु भएको छ ।
माडी नगरपालिका वडा नम्बर ५ की ७३ वर्षीया कौलिहियादेवी महत्तो र मकवानपुर कालिङ्गटार घर भई माडी बस्दै आएका राजकुमार थिङको गएराति मृत्युभएको जिल्ला प्रहरी कार्यालय चितवनले जनाएको छ ।
कौलिहियाले आफ्नै घर पछाडिको शौचालयको बलोमा साडीको पासो लगाएर आत्महत्या गरेको प्रहरीले जनाएको छ ।
यस्तै मकवानपुर कालिङ्गटार घर भई माडी नगरपालिका वडा नम्बर १२ बस्दै आएका भाइकाजी थिङका छोरा राजकुमारको विष खाएर मृत्युभएको छ ।
आइतबार साँझ विष खाएका उनको सीमा सुरक्षामा रहेका सशस्त्र प्रहरीले उपचारका लागि ठोरीतर्फ लैजाँदै गर्दा राति नै मृत्युभएको प्रहरीको भनाइ छ ।
शवको घटना विवरण सङ्कलन गरी परीक्षणका लागि आज बिहान भरतपुर अस्पतालमा ल्याइएको छ ।
दुईवटै घटनाको कारण नखुलेको र अनुसन्धान भइरहेको प्रहरीले जनाएको छ ।
प्रतिक्रिया