चितवनमा ट्रकले कारलाई ठक्कर दिँदा काठमाडौंका तीन जनाको मृत्यु

चितवन, २८ असोज । चितवनको फिस्लिङमा ट्रकले कारलाई ठक्कर दिँदा तीन जनाको मृत्यु भएको छ भने दुई जना घाइते भएका छन् ।

काठमाडौंबाट मुग्लिङ जाँदै गरेको बा ३ च ५५१६ नम्बरको कार र मुग्लिङबाट काठमाडौं आउँदै गरेको ना ४ ख ४४४१ नम्बरको ट्रक एकआपसमा ठोकिदाँ कारमा सवार पाँच मध्ये तीन जनाको घटनास्थलमै मृत्यु भएको हो ।

कारमा सवार काठमाडौं लब्सीफेदीका सरोज तिवारी, ललिता तिवारी र कार चालक सृजन पोख्रेलको मृत्यु भएको जिल्ला प्रहरी कार्यालय चितवनले जानकारी दिएको छ ।

दुर्घटनामा परी घाइते भएका साधुराम तिवारी र आयुषा तिवारीको चितवन मेडिकल कलेजमा उपचार भइरहेको छ ।