काठमाडौं । भारतीय जनता पार्टीका नेता नरेन्द्र मोदीको सपथग्रहण समारोहमा प्रधानमन्त्री सुशील कोइराला जाने कि नजाने भन्ने विषयमा छलफल गर्न बिहीबार मन्त्रिपरिषद बैठक बस्दैछ ।
भारतीय प्रधानमन्त्री नरेन्द्र मोदीको सोमबार हुने सपथ ग्रहणमा निम्तो गरिएपछि प्रधानमन्त्री कोइराला जाने तयारीमा लागेका हुन् । भारतीय जनता पार्टीका विदेश विभाग प्रमुख विजय जोलीले टेलिफोन गरेर सपथग्रहण समारोहमा सहभागी बन्न आग्रह गरेपछि प्रधानमन्त्री कोइरालालाई जान दबाब परेको बताइएको छ ।
प्रधानमन्त्री जाने मनस्थितिमा रहेको र आज मन्त्रिपरिषदबाट निर्णय हुने एक मन्त्रीले जानकारी दिए ।
चीन भ्रमणको निम्तो पाइरहेका प्रधानमन्त्री कोइरालालाई पहिले भारत जाने मौका रहेको पनि उनका सहयोगीले बताइरहेका छन् । भारतीय लोकसभा चुनावका कारण रोकिएको भारत भ्रमणको बाटो खोल्न प्रधानमन्त्री कोइरालाका लागि सपथ ग्रहणको निम्तोले एउटा राम्रो अवसर जुराएको छ । मोदीले सार्क राष्ट्रका समकक्षी सबैलाई सपथमा बोलाएका छन् ।
प्रतिक्रिया