सोमबार, ४ मंसिर २०७४
DainikNepal.com
सोमबार, ४ मंसिर २०७४

रविन्द्र मिश्रमाथि लागे गम्भीर आरोपहरू, महिला सहकर्मीलाई दुर्व्यवहार गरेको दाबी

दैनिक नेपाल २०७४ कार्तिक २८ गते १०:११

काठमाडौं, २८ कात्तिक । विवेशील साझा पार्टीका अध्यक्ष एवम् काठमाडौं क्षेत्र नं. १ बाट प्रतिनिधी सभा निर्वाचनमा उम्मेदवार बनेका रविन्द्र मिश्रविरुद्ध बनेको भिडियो र अडियो सामाजिक सञ्जालमा भाइरल बनेको छ ।

भिडियोमा मिश्रलाई राजावादीदेखि बीबीसी नेपाली सेवामा रहँदा महिला सहकर्मीलाई दुर्व्यवहार गरेको आरोप लगाइएको छ । महिला सहकर्मीहरूलाई दुर्व्यवहार गरेको अभियोगमा बीबीसीमा उजुरी परेपछि मिश्रलाई नसिहत दिइएको उल्लेख छ ।

बीबीसीले मिश्रलाई नेपाल किन पठाएको भन्दै प्रश्न समेत गरिएको छ । साथै उनलाई ईसाई धर्म र पश्चिमा राष्ट्रहरूको इच्छाअनुसार काम गरेको आरोप लगाइएको छ ।

मिश्रले बीबीसी मिडिया एक्सनको खाताबाट नक्कली हस्ताक्षर गरेर एक करोड रुपियाँ निकालेको समेत दाबी गरिएको छ । पैसा निकाल्नेमा कार्की थर गरेका लेखापाललाई मिश्रले साथ दिएको आरोप छ । कार्की र मिश्रको नाताले के पर्छन् भनेर प्रश्न गरिएको छ ।

नेपालका राजनीतिक दलका नेताहरूलाई आफ्ना छोराछोरी सरकारी स्कूलमा किन पढाएर निजी स्कूलमा पठाएको भनेर आरोप लगाई रहने विवेकशील साझा पार्टीका अध्यक्ष मिश्रले आफ्ना छोराछोरीहरूलाई राजधानीको सबैभन्दा महँगो स्कूल रातो बंगला र अमेरिकामा पढन पठाएको समेत भिडियोमा दाबी गरिएको छ ।

‘हेल्प नेपाल नेटवर्क’ नामक एनजिओमार्फत पश्चिमा राष्ट्रहरूबाट थुप्रै सहयोग रकम ल्याएर खाडी र मलेसिया बस्ने नेपालीका लागि केही पनि नगरेको आरोप मिश्रलाई लगाइएको छ । मिश्रले ‘रातो बंगला फाउण्डेशन’लाई ‘हेल्प नेपाल’को खाताबाट एकमुष्ट ठूलो रकम सहयोग गरेको पनि दाबी गरिएको छ ।

नेपालमा राजनीति गर्न अमेरिका, युरोप र अष्ट्रेलियामा बस्ने नेपालीहरूसँग पैसा किन मागेको भनेर सो भिडियोमा प्रश्न गरिएको छ । नेपालको राजनीति गर्ने भए आफै पैसा संकलन गर्नुपर्ने सुझाव दिइएको छ ।

बीबीसी नेपाली सेवामा कार्यरत रहेका बेला मिश्रले लोकमान सिंह कार्कीलाई समर्थन गरेर समाचार र अन्तर्वार्ताहरू सम्प्रेषण गरेको आरोप पनि लगाइएको छ ।

सधै संघीय लोकतान्त्रिक संविधान र गणतन्त्रप्रति नकारात्मक टिप्पणी गर्दै आएका मिश्रले नेपाल साप्ताहिकमा लगातार राजसंस्थाको समर्थनमा धेरै लेखहरू छपाएको पनि भिडियोमा उल्लेख गरिएको छ ।

विवेकशील पार्टीसँग पार्टी एकीकरण गर्नुअघि मिश्रले आफ्नो साझा पार्टीलाई कमल थापा नेतृत्वको राप्रपासँग पार्टी एकीकरण गर्न खोजेको खुलासा पनि गरिएको छ । मिश्रले कमल थापासँग महामन्त्री पद मागेका थिए ।

तर, कमल थापाले महामन्त्री पद दिन अस्वीकार गरेपछि रातारात विवेशील पार्टीसँग पार्टी एकीकरण गरेको आरोप पनि सो भिडियोमा रहेको छ ।

यो भिडियोको निर्माता कांग्रेस कार्यकर्ता भएको बताइएको छ । काठमाडौं क्षेत्र नम्बर १ मा कांग्रेसका प्रकाशमान सिंहभन्दा रवीन्द्र मिश्र बलिया देखिएपछि आएको सहजै अनुमान गर्न सकिन्छ ।

(रविन्द्र मिश्रको सामाजिक सञ्जालमा भाइरल भइरहेको भिडियो)

प्रतिक्रिया
सम्बन्धित